Berdinketa Anoetan (1-1)

Realak gehiago merezi izan du, baina ezin izan du Levanteren kontra irabazi

Talde txuri-urdinak ez du hirugarren garaipena jarraian lortu, baina beste puntu bat lortu du Levanteren aurkako partida berdinduz. Montanierren mutilak bolada onean jarraitzen dute, azken hamairu neurketarik bakarra baino ez baitute galdu. 

Indartsu berdeguneratu da talde txuri-urdina, baina Levante ondo kokatuta egon da eta kontraerasoak osatu ditu. Talde valentziarra hobeto zegoenean, 17. minutuan, Realak lehen gola egin du penaltiz. Nikos Karabelasek Calos Vela lurrera bota du eta aurrelari mexikarrak ez du hamaika metrotatik hutsik egin.

Gola sartu eta gero Reala ondo aritu da eta ez dio Levanteri jokatzen utzi. Hala ere, 27. minutuan epaileak Jose Ignacio Martinezen taldearen aldeko penalti bat adierazi du epaileak 'Chory' Castrok Lelliri egindako falta baten ondorioz. Michelek 1-1eko jarri du markagailuan.

Gola jaso ostean, Realak sakatzen jarraitu du, baina Valentziako taldeak ere aurkera batzuk izan ditu. Bravo oso adi egon da eta ez du gola ekiditzeko arazorik izan. Griezmannek lehen zatiaren bukaeran aukera ona zian du, baina kanpora joan zaio. Reala nagusi zela heldu da atsedenaldia.

Bigarren zatian ere Montanierren gizonak izan dira nagusi, baloia txuri-urdinena izan da eta aurkariak baino aukera gehiago izan dituzte. Aukera nagusiak Carlos Velak, 'Chory' Castrok eta Griezmannek izan dituzte. Hala ere, bigarren zatia hasi eta minutu gutxira, Levantek markagailuan aurretik jartzeko aukera izan du, baina Michelen jaurtiketak langan jo du.

56. minutuan Nikos Karabelasek bigarren txartel horia ikusi du eta Realari guztiz alde jarri zaio partida. Montanierren mutilek Levante bere zelaian sartu dute, baina valentziarrak atzean itxi dira. Zenbait aukera izan dituzten arren ez dute beste golik egitea lortu. Azkenean berdinketarekin geratu dira bi taldeak. Puntuak zapore gozoagoa izan du Levanterentzat Realarentzat baino. 

Fitxa teknikoa:

Real Sociedad: Bravo; Carlos Martinez, Iñigo Martinez, Mikel, De la Bella; Illarramendi, Bergara (Ruben Pardo, 63. min), Xabi Prieto (Agirretxe, 70. min); Griezmann, Vela y Chory Castro (Diego Ifran, 78. min).

Levante: Kiko Navas; Vintra, Iborra, Ballesteros, Lell (Pedro Lopez 46. min); Diop, Valdo, Rios (Juanfran, 59. min), Karabelas; Michel (Ruben, 79. min), Martins.

Golak: 1-0, 17.min : Vela (p). 1-1, 29.  min: Michel (p)

Berdinketa Balaidosen (1-1)

Realak ezin izan du garaipena lortu Celtaren aurka nahiz eta horretarako aukerak izan

Txuri-urdinek puntu bakarra lortu dute Balaidosen Celtaren aurka jokatutako partidan. Ia bigarren zati osoa jokalari bat gehiagorekin jokatu arren, Realak ez du aukera aprobetxatu. Lehen zatian eteko taldea nagusi izan da, baina partida amaieran garaipena eskugarrri izan dute donostiarrek.

Lehen zatiko aurreneko minutuetan ez da aukerarik izan, lehena ordu erdi pasatakoan iritsi da. Celta izan da nagusi lehen zatian, eta 30. minutuan Augustu Fernandezek gol aukera izan du, baina Claudio Bravok jaurtiketa geratu du. Jarraian iritsi da Celtaren gola, Iago Aspasen takoikada baten ondoren Krohn-Dehlik ez du hutsik egin eta 1-0ekoa jarri du markagailuan. Atsedenaldia Galiziako taldea aurretik zihoala heldu da. 

Bigarren zatia hasi eta gutxira, 55. minutuan, Augusto Fernandezek bigarren txartel horia ikusi du, baloia eskuarekin ikutzeagatik eta Celta bat gutxiagorekin geratu da. Momentu horretarik aurrera Reala izan da nagusi. Park etxeko taldearen bigarrena egiteko zorian egon da, baina minutu gitxi geroago, 59. minutuan Elustondok korner bat baliatu du markagailuan berdinketa ezartzeko.

Berdinketa lortu ondoren, Montanierren gizonek dena alde izan dute, baina ez dute markagailua iraultzerik lortu. Agirretxek ezin izan du Xabi Prietoren erdiraketa errematatu, Markelek balia zutoinera bidali du eta Pardok eta Griezmannek ere ez dute asmatu. Garaipena gertu egon arren, berdinetarekin bukatu da neurketa. 

Fitxa teknikoa:

Celta: Javi Varas; Jonny, Cabral, Demidov, Lago; Augusto, Oubiña, Krohn-Dehli, Park (Natxo Insa, 62. min.); Iago Aspas (Alex López, 46. min) y Bermejo (Pranjic, 56. min).

Reala: Bravo; Carlos Martínez, Elustondo, Iñigo Martinez, De la Bella; Illarra (Ruben Pardo, 76. min), Markel; Vela, Xabi Prieto, 'Chory' Castro (Griezmann, 70. min); eta Ifran (Agirretxe, 60. min)

Golak: 1-0, 32. min: Krohn-Dehli. 1-1, 59. min: Elustondo.

Realak bi puntu bidean utzi ditu (1-1)

 Txuri-urdinek ez dute aprobetxatu Deportivo jokalari bat gutxiagorekin gelditzea

Montanierren mutilek puntu bat bakarrik lortu dute, irabazteko aukera argi bat ez aprobetxatuz. Lehen zatian ez Realak, ez Deportivok ez dute joko handirik erakutsi eta bi golak jokaldi bakartuetan heldu dira. Atsedenaldiaren ondoren txuri-urdinek ez dute aprobetxatu talde galiziarra bat gutxiagorekin gelditu izana. 

Lehen zatian Reala jokaldiak sortzen saiatu da, baina Deportivo defentsan fin aritu da eta donostiarrek ez dute min emateko aukera handirik sortu. Aranzubiak erdiraketa bat gaizki desbideratu du, baina De la Bellak ez du asmatu baloia errematatzerako orduan. Minutu gutxi geroago, 27. minutuan, Deportivok Illarramendiren hanka-sartze bat aprobetxatu du 0-1ekoa egiteko. Pizzik jokaldia ondo burutu eta Bravoren aurrean ez du barkatu. 

Txuri-urdinei maldan gora jarri zaie neurketa 0-1ekoarekin eta talde andaluziarra nagusi izan da golaren ondoren. Hala ere, lehen zatia amaitzear zela, 43. minutuan, Carlos Velak baloia lapurtu eta area barrutik jaurtiketa bikaina egin du, baloia ate barrura bidaliz.

Bigarren zatiaren hasiera epaileak Evaldori bigarren txartel hori erakutsi dio eta Deportivo hamar jokalarirekin geratu da. Pacienciaren taldea atsean sartu da eta Realak erasora jo du. Velak, Agirretxek eta Ifranek aukeraren bat izan dute, baina ez dute Aranzubiaren aurrean asmatu. 1-1eko berdinketarekin iritsi da norgehiagokaren amaiera. Honenbestez, Realak 26 punturekin amaitu du lehen itzulia, iragan denboraldian baino bost gehiago.

Fitxa teknikoa:

Reala: Bravo; Carlos Martinez, Ansotegi, Elustondo, De la Bella; Illarramendi, Ruben Pardo (Chory Castro 70. minutua), Xabi Prieto; Griezmann, Vela eta Agirretxe (Ifran, 78. minutua).

Deportivo: Aranzubia; Manuel Pablo, Marchena, Evaldo, Bergantiños; Ze Castro, Andre (Silvio, 66. minutua), Gama, Vazquez (Assunçao,  56. minutua); Pizzi eta Riki (Oliveira, 65. minutua).

Golak: 0-1, 27. minutua: Pizzi. 1-1, 43. minutua. Vela.

Berdinketa Anoetan (1-1)

Azken minutuan Realarentzat puntu garrantzitsu bat lortu du Carlos Martinezek

Realak eta Getafek 1-1 berdindu dute Anoetan. Lafitak 86. minutuan egin du partidako lehen gola eta 93. minutuan Carlos Martinezek sartutako golari esker txuri-urdinek puntu garrantzitsu bat lortu dute. 

Lehenengo zatian partida oso orekatuta egongo da eta aukerak urriak izan dira. Bi taldeak zelaian ondo kokatuta egon dira eta ez dute defentsan ondo jarduteko arazorik izan. 33. minutuan 'Chory' Castrok aukera bikaina izan du bigarren zutoinetik, baina Moyak baloia kornerrera bikain desbideratu du. 

Bigarren zatian indartsu zelairatu dira donostiarrak, Ifranek gola egiteko aukera argia izan du, baina jaurtiketa kanpora joan da. Montanierren mutilek partidaren kontrola izan arren, Getafek erosan gogor jarraitu du.

Lopok 65. minutuan gol auekra argia izan du, baina baloia langara bidali du. Zurutuzak abagune aparta izan du 74. minutuan, baina errematea kanpora joan da. Reala nagusi zenean, 86.  minutuan, Lafitak 0-1ekoa jarri du markagailuan. Hala ere, txuri-urdinek azkar erreakzionatu eta Carlos Martinezek berdinketaren gola egin du 93. minutuan. Txuri-urdinentzat puntu garrantzitsua geratu da etxean. 

Fitxa teknikoa:

Reala: Bravo; Carlos Martinez, Mikel, Iñigo Martinez, De la Bella; Illarra, Pardo, Xabi Prieto (Zurutuza, 66. minutua); Griezmann (Jose Angel, 82. minutua), Chori Castro (Agirretxe, 70. minutua), Diego Ifran.

Getafe: Moya; Alexis, Lopo, Mane, Valera; Lafita (Rodriguez, 88. minutua), Barrada (Gavilan, 84. minutua), Michel, Pedro Leon; Xabi Torres, Alvaro (Alcacer, 74. minutua).

Golak: 0-1, 86. minutua: Lafita. 1-1, 93. minutua: Carlos Martinez.

Puntu bat lortu du Realak partida ona jokatu ondoren

Atleticok, gauza handirik egin gabe, aurrea hartu du markagailuan bigarren zatian. Ondoren epaileak Gabi egotzi du eta Realak erasora jo du. Azkenean, luzapenean berdinketa lortu dute Montanierren mutilek.

Realak 1-1eko berdinketa lortu du gaur Vicente Calderon estadioan Atlético Madrilen aurka. Aurreneko minutuetan bai Reala eta bai Atletico Madril ez dira partidaren bila zelairatu eta ez da aukera argirik egon. Bigarren zatian, zuri-gorriek aurrea hartu dute eta luzapenean berdintzea lortu dute donostiarrek.

Lehen zatian ez da ezer berezirik gertatu, Reala ondo jarrita berdeguneratu da eta ez da arriskurik egon Claudio Bravoren atean. Txuri-urdinak erasokor egon dira, baina ez dute gol aukera askorik sortu. Lehen zatiko azken minutuak iritsi direnean, Illarrak jaurtiketa gurutzatua egin du area barruan, baina kanpora joan da atzelari batek ukitu ondoren. Horrela, golik gabe amaitu da lehen zatia.

Bigarren zatiko lehen minutuetan Agirretxek aukera garbia izan du. Aurrelariak kale egin du Zurutuzaren erdiraketa bokaina jaso ostean. Minutuak aurrera joan ahala, Simeoneren mutilek hobera egin dute eta 54. minutuan Gabik jaurtiketa bikaina egin du eta zutoinaren ondoteik baloia Bravoren atean sartu da.

Gabi neurketako protagonista bilakatu da berriro 74.minutuan, epaileak erdilaria egotzi du bigarren txartel horia aterata. Gertaera erabakigarria izan da partida, izan ere, horren ondoren txuri-urdinek erasora jo dute, berdinketaren bila. 91. minutuan Velak Juanfranen eta Courtoisen zalantzak aprobetxatu eta berdinketa jarri du markagailuan. Berdinketa honekin, Atlético Txapeldunen Ligako postuetatik urrun utzi du Realak.

Fitxa teknikoa:

Atletico Madril: Courtois; Juanfran, Miranda, Dominguez, Filipe Luis; Mario Suarez, Gabi; Arda Turan (Salvio, 56. minutua), Koke; Adrian (Diego, 77. minutua) eta Falcao (Godin, 87. minutua).

Reala: Bravo; Carlos Martinez, Demidov, Mikel Gonzalez, Cadamuro; Elustondo, Zurutuza, Illarramendi (Llorente, 77. minutua), Xabi Prieto; Griezmann (Vela, 80. minutua) eta Agirretxe (Ifran, 59. minutua).

Golak: 1-0, 54. minutua, Gabi. 1-1, 91. minutua, Vela